Azərbaycan Respublikasının miqrasiya orqanlarına qulluğa qəbul ilə əlaqədar  növbəti müsabiqə elan edilmişdir

Dövlət Miqrasiya Xidməti Azərbaycan Respublikasının miqrasiya orqanlarına qulluğa qəbulla əlaqədar Azərbaycan Respublikasının vətəndaşlarına 26 sentyabr 2011-ci il tarixdən 26 oktyabr 2011-ci il tarixədək müsabiqə elan edir.

Miqrasiya orqanlarına qulluğa qəbul Azərbaycan Respublikasının 2009-cu il 4 dekabr tarixli 930-IIIQ nömrəli Qanunu ilə təsdiq edilmiş “Miqrasiya orqanlarında qulluq keçmə haqqında Əsasnamə”nin və “Miqrasiya orqanlarına qulluğa qəbul olunmaq üçün namizədlərlə müsabiqənin keçirilməsi qaydaları haqqında Əsasnamə”nin  tələblərinə uyğun olaraq aparılır.

Müsabiqədə yalnız vakant vəzifələrin tələblərinə cavab verən vətəndaşlar iştirak edə bilər.

Müsabiqəyə sənədlərin qəbulu müvafiq ərizə formasında aparılır. İştirak etmək istəyən vətəndaşlar tələblərə cavab verdikləri halda göstərilən müddət ərzində (şənbə və bazar günləri istisna olmaqla) müvafiq ərizə formasını doldurmalı və qanunvericilikdə nəzərdə tutulmuş digər sənədləri Dövlət Miqrasiya Xidmətinin Aparatının  inzibati binasına -  Bakı şəhəri, Binəqədi rayonu, 3123-cü məhəllə, Binəqədi şossesi 202 ünvanına təqdim etməlidirlər. Müsabiqəyə çıxarılmış vakant vəzifələr haqqında məlumatları Dövlət Miqrasiya Xidmətinin rəsmi internet səhifəsindən (www.migration.gov.az) əldə etmək olar.

Müsabiqə zamanı sənədlərini təqdim edən namizədlər ixtisas imtahanına hazırlaşmaq üçün həftənin I-V günləri saat 10.00-dan 16.00-dək (saat 13.00-dan 14.00-dək istisna olmaqla) Dövlət Miqrasiya Xidmətinin müraciət edə və ya telefon vasitəsi ilə əlaqə saxlaya bilərlər.