Azərbaycan Respublikasının ərazisində müvəqqəti və daimi yaşamaq üçün icazələrin verilməsi ilə bağlı Dövlət Miqrasiya Xidmətinin məlumatı

Miqrasiya qanunvericiliyinə edilmiş dəyişikliklərlə əlaqədar vətəndaşlardan, əcnəbilər və vətəndaşlığı olmayan şəxslərdən daxil olan suallara görə Dövlət Miqrasiya Xidməti bildirir ki,  Azərbaycan Respublikasının ərazisində müvəqqəti və daimi yaşamaq üçün icazələrin verilməsi ilə bağlı müraciətlərin edilməsi müddəti dəyişilməmiş və aşağıdakı kimidir.

Miqrasiya Məcəlləsinə əsasən əcnəbilər və vətəndaşlığı olmayan şəxslər, Azərbaycan Respublikasının ərazisində müvəqqəti yaşamaq üçün icazə verilməsinə əsas olan hallar mövcud olduqda, ölkədə müvəqqəti olma və ya müvəqqəti yaşama müddətinin bitməsinə azı 30 gün qalmış bu barədə icazə alınması üçün Dövlət Miqrasiya Xidmətinə müraciət etməlidirlər.

Azərbaycanda müvəqqəti yaşamaq üçün icazənin müddətinin uzadılması da icazənin verilməsi üçün müəyyən edilmiş qaydada həyata keçirilir.

Azərbaycan Respublikasında daimi yaşamaq üçün icazə verilməsinə əsas olan hallar mövcud olduqda isə bu barədə icazə alınması üçün əcnəbilər və vətəndaşlığı olmayan şəxslər Dövlət Miqrasiya Xidmətinə Azərbaycan Respublikasının ərazisində müvəqqəti yaşama icazəsinin müddətinin bitməsinə ən azı 3 ay qalmış müraciət etməlidirlər.

Azərbaycan Respublikasında daimi yaşamaq üçün icazə 5 il müddətinə verilir. Bu müddətin bitməsinə azı 3 ay qalmış əcnəbinin və vətəndaşlığı olmayan şəxsin müraciətinə əsasən daimi yaşamaq üçün verilmiş icazə yenidən 5 il müddətinə uzadıla bilər. Uzadılmaların sayı məhdudlaşdırılmır.

Azərbaycan Respublikasının ərazisində müvəqqəti və daimi yaşamaq üçün icazə almağa görə müraciət edənlər yuxarıda göstərilən müddətlərə əməl etməlidirlər.